ភ្នំពេញ: ​លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានក្រុមប្រឹក្សាជាតិ​រណសិរ្សសាមគ្គី អភិ​វឌ្ឍន៍មាតុភូមិកម្ពុជា បានអញ្ជើញគោរពវិញ្ញាណក្ខន្ធ ​លោក ង្វៀន ហ៊្វូចុង អគ្គលេខាធិការ គណៈកម្មាធិការ​មជ្ឈិមបក្សកុម្មុយនីស្ដ វៀតណាម ដែលបានទទួលមរណ​ភាពដោយជរាពាធ ក្នុងជន្មាយុ៨០ឆ្នាំ កាលពីថ្ងៃទី១៩ ខែកក្កដា ឆ្នាំ២០២៤។ ពិធីគោរពវិញ្ញាណក្ខន្ធ បានធ្វើឡើងនៅស្ថានទូតសាធារណរដ្ឋសង្គម​និយមវៀតណាម ប្រចាំ​ព្រះរាជាណាចក្រកម្ពុជា នាព្រឹកថ្ងៃសុក្រ ទី​២៦ ខែ​កក្កដា ឆ្នាំ២០២៤នេះ។

​​លោកឧបនាយករដ្ឋមន្ត្រី និងគណៈប្រតិភូ បាន​សង្រួមចិត្តគោរពវិញ្ញាណក្ខន្ធ ​លោក ង្វៀន ហ៊្វូចុង និងបានរៀបចំកូរោនផ្កាចូលរួមរំលែកទុក្ខដ៏ក្រៀមក្រំ​ពីក្រុម​ប្រឹក្សាជាតិ​រណសិរ្សសាមគ្គី អភិ​វឌ្ឍន៍មាតុភូមិ​កម្ពុជា ព្រម​ទាំងបានអញ្ជើញអុជធូបឧទ្ទិសដល់វិញ្ញាណក្ខន្ធ ​លោក​អគ្គលេខាធិការ ង្វៀន ហ៊្វូចុង សូមបានទៅកាន់សុគតិភព​កុំបីឃ្លៀតឃ្លាតឡើយ។

​តាមរយៈសាររំលែកមរណទុក្ខដ៏ក្រៀមក្រំបំផុត, ​លោកឧបនាយករដ្ឋមន្ត្រី ក្នុងនាមក្រុមប្រឹក្សាជាតិ​រណសិរ្សសាមគ្គី អភិ​វឌ្ឍន៍មាតុភូមិកម្ពុជា និង​លោកផ្ទាល់ ពិតជាមានសេចក្ដីតក់ស្លុត និងសោកស្ដាយ​ឥតឧបមា​ចំពោះមរណភាពរបស់ ​លោក ង្វៀន ហ៊្វូចុង អគ្គលេខាធិការ គណៈកម្មាធិការ​មជ្ឈិមបក្សកុម្មុយនីស្ដ វៀតណាម។ មរណភាពរបស់ ​លោក ង្វៀន ហ៊្វូចុង គឺជាការបាត់បង់យ៉ាងធំធេងនូវថ្នាក់ដឹកនាំគំរូដ៏ល្អរបស់ប្រទេសវៀតណាម​ដែលបានដឹកនាំអភិវឌ្ឍន៍ប្រទេសជាតិឱ្យបន្តរីកចម្រើនឥតឈប់ឈរ និងជាឥស្សរជនមួយរូបដែលបានចូលរួម​ពង្រឹង និងពង្រីកនូវចំណងមិត្តភាព សាមគ្គីភាព និងសហប្រតិបត្តិការល្អរវាងប្រទេសកម្ពុជា និងវៀតណាម ឱ្យកាន់តែរឹងមាំ និងជិតស្និទថែមទៀត៕